ناڤەندا نووچەیان – سەما
سەرۆکاتیا ئەنجوومەنێ نوونەرێن عێراقێ کۆبوونەوەیەکا بەرفرەهـ دگەل سەرۆک فراکسیۆنێن پەرلەمانی ئەنجامدا ب مەرەما گەنگەشەکرنا چەند دۆسەیێن چارەنڤیسساز، ل سەری هەمیان دیارکرنا وادەکی بۆ هەلبژارتنا سەرۆک کۆماری و ب داوی ئینانا چەقبەستویا سیاسی یا وهلاتی.
سەرۆکاتیيا پەرلەمانێ عێراقێ د بەیاننامەیەکێ دا دیار کر کو د وێ کۆمبوونێ دا گەنگەشە ل سەر چەندین دۆسەیێن گرنگ یێن کارێ ئەنجوومەنی هاتە کرن و ژ وان ژی دانانا وان یاسایێن گرنگ د بەرنامێ کارێ ڕوونشتنێن بێت دا و هەروەسا تەمامکرنا دەنگدانێ ل سەر لیژنەیێن هەمیشەیی یێن پەرلەمانی.
ديار ژى كر، د کۆمبوونەوەیێ دا ب هووری بەحسێ دۆسەیا هەلبژارتنا سەرۆککۆماری هاتە کرن و جەخت ل سەر گرنگیا بجهئینانا ڤی شایستەیێ دەستووری هاتە کرن دا کو داوى ب وێ چەقبەستویا سیاسی بێت یا کو وهلات تێدا دەرباز دبت د ناڤبەرا كاودانێن ئەمنی و ئابۆری دا.
ئاشكراكر: سەرۆکاتیا ئەنجوومەنێ نوونەران بڕیار دا ڕۆژا شەمبوويێ یا ڕێکكەفتی یازدهیى نیسانێ ببتە ژڤانێ ئەنجامدانا ڕوونشتنا هەلبژارتنا سەرۆککۆماری و د هەمان دەم دا داخواز ژ سەرکردەیێن کۆتلەیێن سیاسی کر کو بەرپرسیارەتیيا خۆ هەلگرن بۆ تەمامکرنا شایستەیێن دەستووری و پێکئینانا حکومەتەکا خودان شیان کو بكارت بەرەنگاری هەموو ئاستهنگيان ببت.