ئیڤان فایق جابرۆ، کو ژ ٦ێ حوزەیرانا ٢٠٢٠ێ پۆستێ وەزیرا کۆچ و کۆچبەران وەرگرتبوو د حکومەتا مستەفا کازمی دا، بەردەوام بوو د کارێ خۆ دا د ناڤ حکومەتا نوو یا محەمەد شیاع سودانی دا ژ ٢٨ێ تشرینا ئێکێ یا ٢٠٢٢ێ. لێ، پشتی سەرکەفتنا وێ د هەلبژارتنێن پەرلەمانێ عێراقێ دا و وەرگرتنا پۆستێ (موقەریر) یێ پەرلەمانێ عێراقێ، سەرۆک وەزیران محەمەد شیاع سودانی وەزیرێ ناڤخۆ، عەبدولئەمیر ئەلشەمەری، ڕاسپارد بۆ ب ڕێڤەبرنا وەزارەتا کۆچ و کۆچبەران ب وەکالەت.
دۆسهیا ئاوارەیێن ئێزدی: پێنج سال بێ چارەسەری
د ماوێ کارێ ئیڤان فایق جابرۆ دا، کو پتری پێنج سالان ڤەکێشا، دۆسهیا ئاوارەیێن ئێزدی ب بێ چارەسەری مایە، ئەڤە د دەمەکێ دایە کو وەزیرا ناڤهاتی چەندین سۆز دابوون دەربارهى ڤەگەڕیانا ئاوارەیان بۆ جهێن وان، لێ ب گۆڕەی زانیاریان، سۆزێن وێ دەربارهى ڤەگەڕیانێ و قەرەبووکرنا وان نەهاتنە ب جهـئینان.
هەروەسا، ئێک ژ ئاریشەیێن سەرەکی ئەوە کو ژمارەکا مەزن ژ ئاوارەیێن ئێزدی یێن ڤەگەڕیایین هێشتا قەرەبووکرنا دارایی یا سۆزپێدایی (کو ب گۆڕەی دەقێ هاتیە هنارتن، چار ملیۆن دینار بوو) وەرنەگرتینە.
سکالهیێن دژی چالاکڤانان
د ماوێ کارێ وێ دا، ب وێ چەندێ دهاتە ڕەخنەکرن کو چەندین سکالا ل سەر ئەندام پەرلەمان و چالاکڤانێن ئێزدی تۆمارکرینە، ئەوێن ڕەخنە ل کارێ وەزیرێ دگرتن، ئەڤ سکالایە دبوونە جهێ نەرازیبوونا ئێزدیان، چنکو د دەمەکى دابوو کو کۆمەلگەها ئێزدی ب ئاریشەیێن مەزن یێن ئاوارەیی دا دەرباز دبوون.
پاشەرۆژا وەزارەتێ
ب وەرگرتنا وەزیرێ ناڤخۆ، عەبدولئەمیر ئەلشەمەری، بۆ ب ڕێڤەبرنا وەزارەتێ ب وەکالەت، چاڤەرێ دئێتەکرن کو د ڤی دەمێ کێم یێ بەری پێکئینانا حکومەتا نوو یا عێراقێ دا، دۆسهیا ئاوارەیان ب شێوازەکێ جودا بێتە ب ڕێڤەبرن، لێ ئێزدی ب هیڤی نە کو د کابینەیا نوو دا کەسەکێ خەمخۆر ڤێ وەزارەتێ ب ڕێڤەببەت، داکو ببتە دەستپێکەک بۆ ب داوی ئینانا نەخۆشیێن وان یێن ١١ سالێن درێژ.