ل 13 ئیلۆنا 2026ێ هەلبژارتنێن ناڤخۆیی ل هەرێما (niedersachen) ئەلمانیا دێ هێنە کرن، ب درێژاهییا سالان پارتێن سیاسی ل دەڤەرێ وەك( SPD, CDU, CSU, FDP, Grüne ) دێ پشکدارى ڤان هەلبژارتنان بن ب تەڤا بەربژارێن ئەلمانی و بیانی ڤە.
ئەڤ هەلبژارتنە هەر پێنج سالان جارەکێ ل هەموو هەرێمێن ئەلمانیا فیدرال دهێنە گێران، کو تایبەتمەندییا وێ د ژیێ دەنگدەری دایە، ئەوژی د سەر 16 سالییێ دا، هەتا کو بشێت دەنگێ خۆ بدەت، کو بەراورد ل گەل هەلبژارتنێن پەڕلەمانی پێدڤییە دەنگدەر تەمەنێ 18 دەربازکربت.
ئیرۆ رۆژ ئەم وەك مللەتێ ئێزدی، پەنابەر و دەربەدەری ڤێ دونیایێ بووینە، تایبەت وەلاتێ ئەلمانیا نۆکە بوویە پرەك ژبۆ ئێزدیان دەربازی تەڤا بیاڤێن ژیانێ ببین، نەخاسمە دەلیڤەکا زێرین بۆمە وەك ئێزدی هاتییە پێش ئیرۆکە بشێین برێکا ڤان شیان و هێزێن بێ وێنە ببینە پشکەک ژ بریارێن سیاسی ل دەڤەرێ، تایبەت برێکێن دیمۆکراسی و هەلبژارتنان، کو ئیرۆکە وەك هاولاتییێن نمرە 2 تەماشەیی مە نەهێتە كرن، ئەز دبێنم ئێزدی لڤێدەر د سێ قویناغێن گرنگدا دەربازبوینە :
قویناغا ئێکێ: خۆ گەهاندن بوویە ژ وارێ باب و باپیران بۆ وارگەهەکێ ئارام یێ ژیانکرنێ ل وەلاتێن کێشوەرێ ئۆرۆپی نەخاسمە ئەلمانیا جهێ ئاکنجیبوونا پترییا مە ئێزدیانە .
قویناغا دویێ: خۆ ئاڤاکرن و خۆ گونجاندنا جڤاکێ ئێزدی د چارچۆڤێ یاسایێن نشتیمانی و ناڤنەتەوەیی دا، لگۆڕەی رێسایێن حکومەتا ئەلمانیا، پێگیری كریە .
قویناغا سێیێ: خۆ رێکخستن ل گەل بیروباوەر و ریسا و رەوشت و تیتالێن گەلێ ئەلمانیا، لژێر سێبەرا دەستوور و یاسایێن بەرکار.
ئەڤە هەڤدەم کو ل هەرێما کوردستانێ و ئیراقێ، ئێزدی د قویناغێن سەختێن ئابۆری و سیاسی دا دەرباز دبن، و هێشتا د دەردێ ڤان نەهامەتیان و ئاوارەیێ دا ژیانێ دبۆرینن، تایبەت پشتی فەرمان و جینۆسایدا 3-8-2014ێ کو هەتا نۆکە تێدا دنالن، لەورا جڤاکێ مە یێ ئێزدی ب هەموو تەمەن و رەگەزێن خۆ ڤە قەستا وەلاتێن دەوروبەر کرن، بۆ هندێ بارسڤکییەکێ ل سەر کەسوکارێن خۆ دروستبکەن و ببنە هەڤکار و پالپشتێن وان ژ هەموو روویەکی ڤە، ئەڤە ل دەمەکی ژ چەرخێ 21 مە بهیچ شێوەیەکی باوەرنەدکر کو رۆژەکێ مللەتێ مە دێ تووشی ڤێ کارەسات و نەهامەتییا وەسا مەزن و دژواربت.
پشتی ناساندنا کۆمکوژیا ئێزدیان ژ ئالییێ پەڕلەمانێ ئەلمانیا ڤە، پتر ڤیان و حەزا وەلاتیبوونێ ل دەف ئێزدیان پەیدابوو، ژبەر ئاشناییا گەل و ئاخا ئەلمانیا ببن، لڤێدەر گەلەك پڕسیار بۆمە دهێنە پێش، ئەرێ ما هەتا کەنگی ئێزدی دێ لڤی حالێ پەریشاندا ژین؟ تا کەنگی مللەتەکێ بندەست و بێ ماف بین؟ گەلۆ ژ راستا ئێزدیان ئەو شیان هەینە كەتوارێ خۆ بگهۆرن؟
بێگومان ئەگەر رەوشا ئێزدیان بەراورد بکەین، بەرامبەر سالێن 2014ێ، دێ بینین کو ژمارەکا زۆر ژ کەسایەتی و ئەکادیمی و ڕەوشەنبیرێن ئێزدیان ئیرۆکە بووینە ناڤێن دیار ل ڤی وەلاتی و دەستێ وان درێژبوویە د زۆربەیا سێکتەرێن ژیانێ دا ل وەلاتێ ئەلمانیا، لەورا ئیرۆکە مە ئەو شیان یێن هەین د هەلبژارتن و چەمکێن بریارێ دا کاریگەری و باندۆرا خۆ هەبیت و لۆبیەکێ بهێز دروست بکەین، وەك وەلاتییەکێ ئەلمان و هەم وەك ئێزدیەك پشتەڤان و پالپشتێن سەرسەختێن دۆزا مللەتێ خۆبین.
ل دویماهێیێ و یا گرنگ ئاماژێ پێبدەم، ئەڤ هەلبژارتنە و یێن داهاتی، ژبۆ جڤاکێ ئێزدی گەلەك گرنگە، زێدەباری پشتەڤانییا مە بۆ بەربژێرێن ئێزدیان ل وەلاتێ ئەلمانییا، گرنگ نینە کی بەربژێر سەربکەڤت، یا پتر جهێ پشتەڤانییێ ئەوە کەسەکی ئێزدی ل گەل هەر بزاڤەکا سیاسی بت، ببتە دەنگ و رەنگێ ڤی خەلکی ل سازییێن دەولەتێ، لەورا پێدڤییە ئەم هەموو پشتەڤانێن گەرمێن بەربژێرێن خۆبین، و دامودەزگەهێن حکومەتا ئەلمانیا ژ نوێنەرێن خۆ بێبەهرنەکەین.