ناڤهندا نووچهيان – سهما
شاندهكێ نوونەرێن پێکهاتەیێ ئێزدی ل گەل ریم ئەلعەبەللی ڕادۆڤان، وەزیرا فیدرالی یا هاریکارییا ئابۆری و گەشەپێدانا ئەلمانیا کۆمبوون، بۆ بهحسكرنا ڕێیێن بهێزکرنا پشتەڤانییا ئەلمانی بۆ ئێزدییان و دووڤچۆنا چەندین پرسێن پەیوەندیدار ب ماف و ڕەوشا وان ڤە.
ل گۆڕەیى زانیاریيێن گەهشتینە کەنالێ سەما، د کۆمبوونێ دا بهحس ل دۆسەیا ڤەگەڕیانا ئاوارەیێن ئێزدی بۆ دەڤەرێن وان هاتە کرن، زێدەباری داخوازييێن پەیوەندیدار ب پاراستنا ئێزدییان ل ئەلمانیا ژ بڕیارێن ديپۆرتكرنێ و رەتکرنا داخوازييێن پەنابەریيێ، و ڕووبرووبوونا گۆتارێن كهرب و كينێ.
هەروهسا شاندى چەندین داخوازى پێشکێش کرن، دیارترینێن وان پشتەڤانیکرنا ئاڤەدانکرنا شنگالێ، پشکداریکرن د ئاڤاکرنا قوتابخانەیان دا، و پێشکێشکرنا پشتەڤانیيێ بۆ زانکۆیا شنگالێ، ب ئاوایەکی کو دهرفهت بت د بهێزکرنا کەرتێ پەروەردهيێ و دابینکرنا دەلیڤەیێن باشتر بۆ نڤشێن داهاتی و شوونتپلا حکومەتا ئەلمانیا د پشتەڤانیکرنا ڤی کەرتێ دا هەبت.
ژ ئالييێ خۆ ڤە، وەزیرا پێشکەڤتنێ گرنگیيا پشتەڤانیکرنا دۆسەیا ڤەگەڕیانا ئاوارەیێن ئێزدی بۆ دەڤەرێن وان دوپات کر، د دەمەکی دا کو شاندى تهكهزى ل سەر پێدڤییا ڤەگوهاستنا داخوازييێن هاتینە پێشنياركرن بۆ پێنگاڤێن کرداری کر، ئەوێن کو دابینکرنا ئێمناهی، کەرامەت و پشتەڤانیکرنا پاشەڕۆژا زاڕۆکێن پێکهاتەیێ ئێزدی مسۆگەر دکەن.
