سه‌ما
ئيرۆ چارشەمبوويێ، 13-11-2024، مەسرور بارزانی، سەرۆکێ حکومەتا هەرێما کوردستانێ، ل فڕۆکەخانا نێڤدەولەتی یا هەولێرێ، پێشوازی ل سەرۆک وەزیرێ فیدرال محەمەد شیاع سودانی کر.
حکومەتا هەرێما کوردستانێ د راگەهاندنەکێ دا ئاماژە ب وێ چەندێ کریە کو سەرۆک وەزیرێ فیدرال، پیرۆزباهی ل سەرۆکێ حکومەتا هەرێما کوردستانێ کر ب هه‌لكه‌فتا سەرکەفتنا هەلبژارتنێن پەرلەمانێ کوردستانێ و ئاماژە ب وێ چەندێ دا کو سەقامگیریا سیاسی یا هەرێما کوردستانێ، بنگەهەکێ گرنگە بۆ سەقامگیریا هەمی عیراقێ، سەرۆک وەزیرێ فیدرال، هەروەسا دوپاتى ل سەر گرنگیا پێکئینانا کابینا نوو یا حکومەتا هەرێما کوردستانێ کر ژ بۆ پێشڤەبرنا پتر یا هاریکاری و هەماهەنگیا ناڤبەرا هەردوو حکومەتێن هەرێم و فیدرال.
دكۆمبوونێ دا، وەک ئاماژه پێ هاتيه دان “گەنگەشە ل سەر کێشە و پرسێن تایبەت ب مووچە و پشکا هەرێما کوردستانێ د بودجا گشتی یا فیدرال، دەستپێکرنا ژ نوو یا هنارتنا نەفتا هەرێمێ و ئامادەکاریێن سەرژمێریا گشتی یا دانیشتوانان ل عیراقێ هاتە کرن.”
دەربارەی پرسا مووچان، سەرۆکێ حکومەتا هەرێما کوردستانێ، دوپات ل سەر پێدڤیا دویرئێخستنا پرسا خەرجکرنا مووچێن هەرێمێ ژ هەر ناکۆکیەکا سیاسی کر، د بن رۆناهیا بڕیارا دادگەها بلند یا فیدرال، هەروەک دەڤەرێن دی یێن عیراقێ.”
دەربارەی دەستپێکرنا ژ نوی یا هنارتنا نەفتا هەرێمێ ژی، “دوپات ل سەر گرنگیا دەستپێکرنا ژ نوو یا پرۆسەیا هنارتنا پترۆلێ د دەمەکێ زوی دا و نەهێلانا ئاستەنگ و کێشەیێن بەر پرۆسەیێ هاتە کرن، ب شێوەیەکێ کو د بەرژەوەندیا هەموو هاوەلاتیێن هەرێما کوردستانێ و عیراقێ دا بت.”
تەوەرەکێ دی یێ كۆمبوونێ، تایبەت بوو ب سەرژمێریا گشتی یا ئاكنجيان ل عیراقێ، د ڤی واری دا، هەڤرابوون ل سەر سەرئێخستنا پرۆسەیێ ژ بۆ مەرەما گەشەپێدانێ، ب بەرچاڤگرتنا تێبینیێن هەرێما کوردستانێ د ڤی واری دا.