ناڤهندا نووچهيان – سهما
پێنج شهمبوويێ، 19ى حوزهيرانا 2025، ل بنگههێ لالش ل دهۆكێ دانوستاندنهكا ڤهكرى ل دۆر “چل مێرا ژلایێ مێژوویی و ئایينی ڤه” هاته ڕێكخستن.
د بەردەوامیديا چالاکیێن پێنج شەمبا ڕەوشەنبیری دا، ب ئامادهبوونا كۆمهكا ئهكادیمی و كهسايهتى و ڕهوشهنبيران، بنگههێ لالش يێ ڕهوشهنبيرى و كۆمهڵايهتى ل دهۆكێ دانوستاندنهكا ڤهكرى ل دۆر “چل مێرا ژلایێ مێژوویی و ئایينی ڤه” بۆ نڤيسهر هۆگر حهيدۆ ڕێكخست.
ل دهستپێكێ خۆلهكهكێ سهكنين وهكو ڕێزگرتن بۆ گيانێ جانگۆريێن كوردستانێ سهركاروانێ وان بارزانيێ نهمر و كاك ئهدريسێ ههردهم ساخ.
پاشان نڤيسهرى ب تێر و تهسهڵى بهحسێ چل مێرا ژلایێ مێژوویی و ئایينی ڤه كر و دياركر، هەكە ل ڕەهـ و ڕیشالێن چل مێران بگەرین دێ بۆ مە خۆیا بت دیرۆكا وێ د زڤرتە سەردەمێ سۆمەریان، ژبهركو د دیتنا وان ده ژمارە 40 گەلەك یا گرنگ بوو، گرێدان ب خوداوەند (ئەنكی) كو ل جهم وان خوداوەندێ ئەردی و ئەڤا ژێر ئەردی، زانین، جادوو، چارەنڤسی و هونەر ….هتد، دیارە ل جهم وان خوداوەندێ چل دیاردێن خوداوهندێ سروشتی بوویە.
گۆتژى: ل جەم ئێزدیان و كاكائیان ژمارە چل یا گرێدایە ب هندەك داب و نەریتان ڤه مینا: چل مێرا، سماتە چل مێرا، چلە خانە، ههروهسا مەحفەلا شیخادى ژی ژ چل ئەنداما پێك هاتبوو، ديسان ئێك ژ وان جهێن ل داستانێ دا هاتی(شوبور) ل جەم سۆمەریان و (شنار) دتەوراتێ دا ب جهەكێ پیرۆز دئێتە دانان كو ئیڕۆ دبێژنێ( شنگار) كو جهێ كوردێن ئێزدی یە.
ههر دهربارهى چل مێرا، ئامادهبوويان چهندين پرسيار ئاراستهى نڤيسهرى كرن و بابەت پتر دەولەمەندکرن.
ب مهرهما پێشڤهبرنا بزاڤا هزرى و ڕهوشهنبيرى و پتر هايداربوون ل سهر ڕهوشا ئێزديان، ل ههموو ڕۆژێن پێنج شهمبا ل بنگههێ لالش ل دهۆكێ ڕهوشهنبيرێن ئێزديان ل ههڤ كۆمڤه دبن و دانوستاندنێ ل سهر چهندين مژارێن گرنگ دكهن.
