“میرێ ئێزدیان و فارس عیسا دوپاتی ل سەر بجهئینانا ڕێککەفتنامەیا شنگالێ کر

سه‌ما

ئيرۆ رۆژا دووشه‌مبوويێ رێكه‌فتى 15ـى كانوونا ئێكێ 2025، ب سه‌رپه‌رشتيا ميرێ ئێزديان حازم ته‌حسين به‌گ و شاندێ دگه‌لدا كو پێكهاتبوون ژ د.خه‌له‌ف شنگالى شيره‌تكارێ سه‌رۆكوه‌زيرانێ عيراقێ و برين مير ته‌حسين به‌گ باليۆز ل وه‌زاره‌تا ژ ده‌رڤه‌ يا عيراقێ سه‌ره‌دانا فارس عيسا سه‌رۆكێ نڤيسينگه‌ها نوونه‌رێ حكومه‌تا هه‌رێما كوردستانێ ل به‌غدا كر، و دوپاتی ل سەر بجهئینانا ڕێککەفتنامەیا شنگالێ کر

د چارچۆڤێ ديدارێ دا، به‌حس ل رێكێن بهێزكرنا پێكڤه‌ژيانا ئاشتيانه‌ دناڤبه‌را پێكهاتێن جودا جودايێن هه‌رێما كوردستانێ هاته‌ كرن، رؤلێ حكومه‌تا هه‌رێما كوردستانێ د چه‌سپاندنا به‌هايێن پێكڤه‌ژيان و برايه‌تيێ دناڤبه‌را وه‌لاتيێن كوردستانێ بلند نرخاند.

هه‌روه‌سان هه‌ردوو ئاليان، به‌حس ل بارودۆخێ ئاواران ل كه‌مپێن هه‌رێما كوردستانێ و ديڤچۆن بۆ رێكێن چاره‌سه‌كرنا ئاريشه‌يێن وان و كێمكرنا ئازارێن وان و ده‌سته‌به‌ركرنا ژيانه‌كا ئازاد و سه‌رفه‌راز كر.

هه‌روه‌سان رێككه‌فتنا شنگال كو دناڤبه‌را حكومه‌تا هه‌رێما كوردستانێ و حكومه‌تا عيراقا فيدرال هاتبوو ئيمزاكرن هاته‌ به‌حسكرن، هه‌ڤده‌م رۆلێ نونه‌راتيا نڤيسينگه‌هێ د چاڤدێريكرنا ڤێ پرسا گرنگ دا گوتوبێژ كرن.

ل داوييا ديدارێ دا مير حازم ته‌حسين به‌گ ميرێ ئێزديان سوپاسى و پێزانيێن خۆ بۆ سه‌ركردايه‌تيا هه‌رێما كوردستانێ ب تايبه‌تى رێزدار سه‌رۆك مه‌سعود بارزانى دا دياركرن، ڕۆلێ سه‌رۆكى د پێشخستن و بهێزكرنا پێكڤه‌ژيانا ئاشتيانه‌ و گرنگيدانا به‌رده‌وام ل سه‌ر مافێن پێكهاته‌يان بلند نرخاند.