ناڤه‌ندا نووچه‌يان – سه‌ما
ئه‌ندامه‌كێ په‌رله‌مانێ عيراقێ ل سه‌ر فراكسيۆنا پارتى ديموكراتى كوردستان ئاماژه ب وێ چه‌ندێ دا، ژ سه‌رجه‌مێ 94 پرۆژه‌يێن تەرخانکری بۆ سندوقا ئاڤاکرنا شنگالێ، ب تنێ 14 پرۆژە بۆ شنگال و ناحيا گرعزێر هاتنە دان، ئه‌ڤه ژى سته‌مه‌كا مه‌زنه ده‌رهه‌قێ ئه‌ڤان ده‌ڤه‌ران دا هاتيه كرن.
مه‌حما خه‌ليل، ئه‌ندامێ په‌رله‌مانێ عيراقێ ل سه‌ر فراكسيۆنا پارتى ديموكراتى كوردستان دراگه‌هاندنه‌كێ دا گۆت: سەرەرای سەرکەفتنا بزاڤێن وان بۆ دامەزراندنا سندۆقا ئاڤه‌دانکرنا شنگالێ، لێ پرۆژێن سندۆقێ هاتنە بەلاڤکرن ل چەندین دەڤەران، ئەڤە ژی ب ڕێکا راگەهاندنا سەرۆک وەزیرێن عيراقێ دەربارەی دەستپێکرنا پرۆژێن شنگال و دەشتا نەینەوا.
ئه‌ندامێ په‌رله‌مانێ عيراقێ دبێژت: د دەمێ بوری دا، مە جهێ گۆمانێ ژ ڤان کریاران هەبوو، و نها دیار بوو کو گۆمانا مە د جهێ خۆ دا بوو، ئەڤە ژی کر کو سەبرا مە نەما و کاسا مە سەرێژ بوو، و ئێدی نە مومکینە کو ئەم بێدەنگ بين، ب تایبەتی پشتی دیار بوو کو رێژەیا کێم یا پرۆژان نە گونجایە دگەل قەبارێ ئێش و بێ به‌هربوونێ ئه‌وا شنگال و گرعزێر ژێ دناڵن، سەرەرای قه‌بارێ زیانێ، رێژەیا هەژاریێ، و چڕیا ئاكنجيان.
ئاشكراكر: ژ سه‌رجه‌مێ 94 پرۆژێن تەرخانکری بۆ سندۆقا ئاڤه‌دانکرنا شنگالێ، تنێ 14 پرۆژە هاتنە دان بۆ شنگال و گرعزێر، ئەڤە ژی زولمەکا مەزنە دەرهەقێ ڤان هەر دو دەڤەران کو بارێ تیرۆرێ و وێرانكرن و پشتگوهـ خستنێ هەلگرتینە.
گۆتژى: مە باوەری هه‌بوو کو گەلەک سۆز هەنە بێنه جێبەجێکرن، ئەڤە ژی کریە کو ئاخا شنگال و گرعزێر ببنە ناڤ ونیشانا زولمێ بێ چ ماف.
مه‌حمه‌ا خه‌ليل ته‌كه‌زكر، داخوازێ ژ سەرۆکوەزیرێن عيراقێ دکەین کو لیژنێن لێکۆلینێ دگەل هەموو بەرپرسان پێکبینن بۆ زانینا ئەگەران، هەروەسا لێکۆلینێ دگەل حکومەتا خوه‌جهی یا نەینەوا ئەنجام بدەت.
راگه‌هاند ژى: ئەم دێ ڤى كه‌يسى ل پەرلەمانێ عيراقێ ڤەکەین و گازی هەموو بەرپرسێن پەیوەندیدار کەین بۆ ئاشکراکرنا ئەگەران و زولما ل شنگال و ناحیا گرعزێر هاتیە کرن.
هه‌روه‌يسا دوپاتكر، ژ حکومەتا خوه‌جهی یا نەینەوا دخوازين کو لیژنەیەکێ پێکبینت بۆ زانینا کى كه‌مته‌رخه‌مه د ڤی بابەتی دا دەرهه‌قێ شنگال و گرعزێر دا، ئەوێن کو ژ دەڤەرێن هەری زیانڤێکەفتی نە ژ ئەگەرێ کریارێن تیرۆرستی و لەشکەری و هێشتا ب رێژەیا 85% وێران نە، سەرەرای ڤێ یەکێ، چ پرۆژە تێدا نەهاتینە ئه‌نجامدان.
بۆ زانين، سەرۆکوەزیرێ عیراقێ راگەهاندبوو د چارچووڤێ پاکێجا ئێکێ دا، دێ 14 پرۆژەیێن ژێرخانە و ئاڤەدانکرنێ ل قەزا شنگال و ده‌شتا نەینەوا ڤەکەن.