سەما: حەسۆ هورمی
دادگەها تێهەلچوونێ ل وەلاتێ هۆلەندا، ئیرۆ ڕۆژا چارشەمبوویێ 25ی ئادارا 2026، بڕیارا زیندانکرنا توهمەتبار حەسنا ئەلف یا تەمەن 34 سالی بۆ ماوێ نەهـ سالان دەرکر.
ئەڤە ژی پشتی سەلماندنا توهمەتا کۆیلەکرنا ژنەکا ئێزدی ل سووریێ ل سەردەمێ دەستهەلاتا ڕێکخراوا داعشێ، کو وەک ئێکەم تاوانا ب ڤی ڕەنگی دئێتە هەژمارتن ل هۆلەندا وەک تاوانەک دژی مرۆڤاتییێ دادگەهکرن بۆ هاتییە ئەنجامدان.
بەشێ تاوانێن ناڤدەولەتی ل دادگەها تێهەلچوونێ ل لاهای بڕیارا خۆ ڕاگەهاند کو تێدا سزایێ زیندانێ ژ دەهـ سالان کێم کر بۆ نەهـ سالان کو پێشتر ل سالا 2024 ب شێوەیەکێ دەستپێکی هاتبوو دەرکرن، دگەل نەچارکرنا توهمەتبارێ ب دانا قەرەبوویەکێ ب کوژمێ 15 هەزار یۆرۆیان بۆ قوربانییا ئێزدی.
دادگەهێ حەسنا ئەلف کو ب ڕەگەز مەغربییە و خەلکا باژێرێ ئینسخیدە بوو، ب چەندین توهمەتان تاوانبار کر کو پێکهاتبوون ژ کۆیلەکرنا ژنەکا ئێزدی و ئەندامبوون د ڕێکخراوا تیرۆرستییا داعشێ دا و پڕۆپاگەندەکرن بۆ تاوانێن تیرۆرستی و هەروەسا خستنا ژیانا کوڕێ خۆ یێ چار سالی د ناڤ مەترسییێ دا.
ل دووڤ ڕێورەسمێن دادگەهێ، توهمەتبار ل سالا 2015 چۆیە سووریێ دا کو پەیوەندییێ ب ڕێکخراوێ بکەت و ل وێدەرێ شوو ب چەکدارەکێ داعش کرییە و سێ زاڕۆک ژێ هەبووینە، پاشان چۆیە مالا چەکدارەکێ دی یێ کو ژنەکا ئێزدی وەک کۆیلە ل جەم بوو، و ل وێدەرێ توهمەتبارێ ئەو ژنا ئێزدی نەچار کرییە کارێن مالێ بۆ بکەت و خزمەتا وێ بکەت ل باژێرێ ڕەققە ل وەلاتێ سووریێ.
دادوەری ل دەمێ خواندنا بڕیارێ ئاماژە ب وێ چەندێ کر کو توهمەتبارێ ب هەڤکاری دگەل زەلامی ئازادییا کەسی یا قوربانییا ئێزدی ب شێوەیەکێ سکرسایانە پێشێل کرییە، و قوربانی وەک کۆیلە بۆ بەرژەوندیا خۆ یا کەسی بکارئینایە.
ئەڤ کەیسە پشتی تێهەلچوونەکێ هات کو ژ لایێ داواکارێ گشتی و توهمەتبارێ بخۆ ڤە هاتبوو پێشکێشکرن، کو داواکارێ گشتی داخوازا دەهـ سالێن زیندانێ دکر، لێ حەسنا ئەلف پترییا توهمەتان ڕەت دکرن و دگۆت کو دایکا وێ ئەو نەچار کرییە گەشتێ بکەتە سووریێ.
ئەڤە وەک ئێکەم دادگەهکرن ل هۆلەندا دئێتە هەژمارتن کو ب توهمەتا ئەنجامدانا تاوانان دژی ئێزدییان هاتییە ئەنجامدان، و ڕوونشتنێن دادگەهێ ل هۆلەکا پاراستی ل فرۆکەخانا سخیپۆل ب ڕێڤەچوون کو تێدا قوربانییان ل ڕۆژێن 9 هەتا 12ی شوباتا 2026 دانپێدانێن خۆ دان، و دەزگەهێ ناڤدەولەتی یێ ئێزدییان ل دژی جینۆسایدێ و سەنتەرێ کەی جی لۆبی ب ئامادەبوونا سەرۆکێ هەردوو ڕێکخراوان د ڕوونشتنان دا بەشدار بوون.
پشتی دانوستاندنێن دژوار ل دادگەهێ، ئیرۆ بڕیارا داوییێ هاتە خواندن و ب ڕێیا شاشەیێن تەلەفزیۆنی توهمەتبار ژ بڕیارێ هاتە ئاگەهدارکرن.
دئێتە زانین کو حەسنا ئەلف ئێک بوو ژ وان دوازدە ژنێن هۆلەندی یێن کو حکومەتێ ل سالا 2022 ژ کەمپێن دەستەسەرکرنێ ل سووریێ ڤەگێراینەڤە، و هەر ل دەمێ گەهشتنا وان هاتبوونە دەستەسەرکرن ژبەر گۆمانا هەبوونا پەیوەندییێ ب ڕێکخراوا داعش ڤە.
ل داوییێ ئاماژە ب وێ چەندێ دئێتەکرن کو مالپەرێ فەرمی یێ دادگەهێ هێشتا دەقێ بڕیارێ ب تمامى بەلاڤ نەکرییە، و ئەو وێنێن ل ناڤ هۆلا دادگەهێ هاتینە گرتن نە د ڕوون بوون ژبەر هەبوونا بەربەستەکێ شویشەیی د ناڤبەرا ئامادەبوویان و توهمەتبارێ دا.
ژێدەر: ئاژانسێن نووچەیێن هۆلەندا.