سەما – مەروان داود
هونەرمەندێ ناڤدار یێ ڕۆژئاڤایێ کوردستانێ “دلۆ دۆغان” د دیدارەکا تایبەت دا بۆ سەما بەحسێ هونەرا خۆ و ڕەوشا ميۆزیکا کوردی و پێگەهێ گرنگێ دەڤەرا شنگالێ د پاراستنا کەلتوورێ ڕەسەن یێ کوردی دا کر.
دلۆ دۆغان بهحس ل كارێ خۆ يێ هونهرى دكهت و دبێژت: د دەستپێکا کارێ خۆ یێ هونەری دا، ب تایبەتی پشتی بەلاڤکرنا ئەلبوما خۆ یا ئێکێ “رەبەنێ” د سالا 2004ێ دا کو ژ 10 سترانان پێکهاتبوو، ل سالا 2008ێ گەهشتمه ئەوێ باوەریيێ کو د ناڤبەرا ئاواز و دابەشکرنا ميۆزیکا کوردی ل ڕۆژئاڤا جۆرە تێکهەلبوون و دووبارەبوونەک هەیە. ژبەر هندێ، وی بڕیار دا شێوازەکێ جودا و نوو د ڕوویێ ناڤەڕۆک و ئاوازێ دا پێشکێش بکەت داکو ڕەنگەکێ تایبەت ل ميۆزیکا کوردی زێده بکەت، و دوپات کر کو هەتا ڕادەیەکی یێ سەرکەفتی بوو د گەهشتنا ڤێ ئارمانجێ دا.
د بەرسڤا پسیارەکێ دا دەربارهى هەلبژارتنا جوانترین سترانا خۆ، دۆغانی کو خودانێ سێ ئەلبوم و چەندین سترانێن تاکەکەسی یە، ڕاگەهاند: “بۆ من هەموو بەرهەمێن من خۆش و نێزیکێ دلێ منن، ئەگەر ئەز هەست ب ڕەسەناییا سترانەکێ نەکەم، چ جاران تۆمار ناکەم. ئەز ناخوازم چ سترانان ل سەر یێن دی مەزن بدەم داکو ماف و بهايێ بەرهەمێن دی وندا نەبت؛ لێ داویيێ بڕیارێ ددەمە دەستێ گوهدار و حەزژێکرێن هونەرێ خۆ. “
د پشکەکا دی یا دیدارا خۆ دە، دلۆ دۆغان پەسنا دەڤەرا شنگالێ کر و گۆت: ” شنگال کانییا هونەرێ ڕەسەن و پارێزڤانێ ڕاستەقینە یا زمانێ کوردی یێ زەلال و پاقژە.” وی ئاماژە ب وێ چەندێ کر کو هونەرێ شنگال باندۆڕەکا مەزن ل سەر هونەرمەندان ب گشتی و هونەرێ رۆژئاڤا ب تایبەتی هەبوویە، ژبەر سترانێن فۆلکلۆری، چ یێن شێناییێ بن یان یێن کێف و دیلانێ، ژ بەر تایبەتمەندییا ئۆلی یا جڤاکی ل شنگالێ، هەتا نهۆ ب پاقژی و زەلالی ماینە.
هونەرمەند دلۆ دۆغان شانازییا خۆ ب هەڤالینییا خۆ یا ل گەل گەلێ ئێزدی دیار کر و ڕاگەهاند، چ جاران خۆ د ناڤ وان دا ب غەریب من نەدیتییە. وی تەکەز کر کو پشتگیریکرنا دۆزا ئێزدیيان ب ئەرکەکێ ئەخلاقی و هونەری دزانت، ژبەر “خەلکێ مە یێ ئێزدی ڕەهـ و کۆکێن مە نە.”
ل داویێ ، دۆغانی هێژایی و گرنگییا پڕۆژەیێن راگەهاندژێ یێن تایبەت ب جڤاکێ ئێزدی ڤە بەرز نرخاند و گۆت: “ئەم پێدڤی ب کەنالەکێ تایبەت یێ وەک سەما بوون، دا کو ببتە دەنگ و ڕەنگێ ئێزدیيان ، داکو ئەڤ کەنالە ببتە پرەک بۆ نیشاندان و ناساندنا چاند و هونەرێ وان یێ ڕەسەن، و ڕێ خۆش کەت بۆ ناسین و شۆپاندنا پتر یا هونەرمەند و داهێنەرێن ئێزدی.”
ناڤبرى ژ دایکبوویێ باژارێ تربەسپیێ یە ل ڕۆژئاڤایێ کوردستانێ و ژ مالباتهكا هونەر دۆسته بوویە و ژ زارۆکاتییا بڕیار دا د جیهانا ميۆزیکێ دا داهێنانێ بکەت.