ناڤەندا نووچەیان – سەما
مەسرور بارزانی، سهرۆكێ حكومهتا ههرێما كوردستانێ زەنگا سالا نوو یا خاندنێ 2026-2027 لێدا و چەند پەیامەک ئاراستەی قوتابی و مامۆستایان کرن.
سبا ئيرۆ ئێکشەمبێ، 20ی ئەیلوولا 2026، مەسرور بارزانی، سەرۆکێ حکومەتا هەرێما کوردستانێ، ب ئامادەبوونا د. ئالان حەمە سەعید وەزیرێ پەروەردێ، ل قوتابخانەیا “گلۆبال” ل باژێرێ هەولێرێ، زەنگا دەستپێکرنا سالا نوو یا خواندنێ 2026-2027 لێدا و پەیڤەک ئاراستەی قوتابی، مامۆستا و گەلێ کوردستانێ کر.
ل دەستپێکا پەیڤا خۆ دا سەرۆکێ حکومەتێ سەرەڕای پیرۆزباهیيا سالا نوو یا خواندنێ، هیڤیيا سالەکا پر ل دەستکەفت و ئارامی بۆ هەموو قوتابی و مامۆستایان خواست و ئاماژە ب وێ چهندێ دا کو کوردستان چاڤەڕێی نفشێ نوویە دا ل پاشەڕۆژێ ئەرکێ برێڤەبرنا وەلاتى بگرنە دەست.
سهرۆكێ حكومهتێ تیشک ئێخستە سەر بزاڤێن حکومەتێ و وەزارەتا پەروەردێ بۆ بلندکرنا ئاستێ پەروەردێ و ئامارێن ئاڤەدانکرنا کەرتێ پەروەردێ دیارکرن:
ئاڤاکرنا قوتابخانەیێن نوو: پتر ل 310 قوتابخانەیێن نوو هاتینە ئاڤاکرن.
زێدهکرنا پۆلان: پتر ل 629 ژۆرێن نوو بۆ قوتابخانەیان هاتینە زێدهکرن.
نووژەنکرن: کۆمەکا گشتی یا 3,175 ژۆران هاتینە نووژەنکرن، هەڤدەم ئەڤسالە ب هاریکاریيا “کوردستان فاوەندەیشن” بزاڤا نووژەنکرنا پتر ل 100 قوتابخانەیێن دیتر هاتیيه دان.
مەسرور بارزانی زنجیرەکا پەیام و ڕێنماییان ئاراستەی قوتابییان کرن و داخواز ژ وان کر، ڕێزێ ل جیاوازیێن ئایین و نەتەوان بگرن و حەز ژێکرن د ناڤبەرا وان دا هەبت؛ دۆستێن ژینگههێ بن و پاقژیا قوتابخانێ و وەلاتی بپارێزن؛ ڕێزێ ل خەبات و قوربانیيێن پێشمەرگە و شەهیدان بگرن، چنکو ئەڤ وەلاتە بەرهەمێ خوون و ڕەنجا وانە.
دەقێ پەیڤا مەسرور بارزانی، سهرۆكێ حكومهتا ههرێما كوردستانێ:
ب ناڤێ خودێ مەزن و دلۆڤان
قوتابییێن خۆشتڤى
مامۆستایێن بەڕێز
ئامادەبوویێن هێژا
زۆر خۆشحال م کو ئەڤرۆ دگەل هەوە ل ڤێ قوتابخانەیا خۆش بەشدارم بۆ دەستپێکرنا ساڵەکا نوویا خوێندنێ، ساڵا (2026-2027).
دەستپێکرنا ڤێ ساڵا نوو ل هەوەیێن خۆشتڤی، ل هەمی قوتابییێن خۆشتڤییێن ڤێ قوتابخانێ و مامۆستایێن ڤێ قوتابخانێ و هەمی قوتابییێن کوردستانێ و هەمی مامۆستایان پیرۆز دکەم، هێڤیدار م ساڵەکا پڕ ل دەستکەفت و خۆشی و ئارامی د پێش هەوە دا بێت. سەرکەفتی بن د ئەڤساڵە دا و د ساڵێن داهاتی ژی دا.
ماشەڵڵا ل وزەیا هەوە و ل ژیرییا هەوە، زۆر خۆشحال بووم دەما هاتیمە ژوورڤە و من دیتی هەمی ب وزەیەکا زۆر ڤە چاڤەڕێ بوون دا کو دەست ب ساڵەکا نوویا خوێندنێ بکەن. بیرتان نەچیتن کو کوردستان چاڤەڕێیا هەوەیە. ئهو دێ ببنە کەسێن مەزن و کارتێکەر دا کو وەلاتێ خۆ برێڤە ببەن.
ل دەستپێکێ دڤێم بۆ هەوە باس بکەم کو حکوومەتا هەرێمێ ئەوا د شیاندا بیت بۆ پشتیوانیکرنا هەوە و پشتیوانیکرنا مامۆستایێن بەڕێز درێغیێ ناکەت و وەزارەتا پەروەردێ بەردەوام بزاڤا وێ چەندێ کری بێت کو ئاستێ خوێندنێ وەک ناوەرۆک، وەک قوتابخانە، وەک ئاڤاکرنا وان جهێن پێویست بۆ فێرکرنێ، گەشە پێ بدەت و پتر پرۆسەیا خوێندنێ بەرەڤ پێشڤە ببات. ئەو ژمارەیێن د دەستێ من دا، هەر د ڤی دەمی دا پتر ل 310 قوتابخانەیێن نوو هاتینە ئاڤاکرن و نزیکی 629 ژوورێن نوو ل هندەک قوتابخانەیان هاتینە زیادکرن، کۆما گشتی یا وان قوتابخانەیێن د ڤی دەمی دا هاتینە نۆژەنکرن 3175 قوتابخانەنە کو بەشەکێ زۆر ژ وان ژ لایێ حکوومەتێ و بەخشەرێن بەڕێز ڤە بوویە و ئەڤساڵە وەک زانم پتر ل 100 قوتابخانەیان ژی ژ لایێ (کوردستان فاوندەیشن) بزاڤا نۆژەنکرنا وان هاتیا دان. ئەڤە هەمی دکەڤنە خزمەتا هەوەیێن بەڕێز و خۆشتڤی.
حکوومەت دێ بەردەوام بیت ل سەر دابینکرنا کەلەپەلێن پێویست، دا کو ئهو بشێن د کەشەکێ ئارام و ساخلەم دا گەشێ ب خوێندنا خۆ بدەن. جلوبەرگێن ئەڤساڵە یێن هەوە ژی زۆر جوانن، ئینشائەڵڵا ساڵ بۆ ساڵێ ژی ئهو دێ شێن پتر ل قوتابخانەیێن خۆ یێن خۆش سەرکەفتنێن مەزن ب دەست خۆ ڤە بئینن.
داخوازێ ژ قوتابییێن خۆشتڤی دکەم، هندەک ئاخفتن هەنه بیرتان نەچیتن، پێش هەمی شتەکێ گرنگیێ ب خوێندنا خۆ بدەن، خوێندن دشێت هەوە بکەتە کەسێن سەرکەفتی تر د ژیانا هەوە دا. پێویستە ئهو مرۆڤدۆست بن پێش هەمی شتەکێ، حەژ ئێکتر بکەن، حەژ مامۆستایێن خۆ بکەن، حەژ دایک و باب و کەسۆکارێن خۆ بکەن. بزانن ئەم ب وێ چەندێ یێن جوانین کو ژ ئایینێن جودا و نەتەوەیێن جودا هاتینە، ل بەر هندێ حەژ ئایینێن دی ژی بکەن، ڕێزێ ل ئێکتر بگرن و ڕێزێ ل جوداهییێن وەلاتێ مە بگرن کو بێگومان ئەڤ جوداهیا هەیی وەلاتێ مە جوانتر کری کە.
داخوازێ ژ هەوە دکەم دۆستێن ژینگێ بن، ماڵا خۆ ب پاقژی ڕابگرن، قوتابخانەیا خۆ ب پاقژی ڕابگرن، وەلاتێ خۆ ب پاقژی ڕابگرن. من زۆر جاران ژی گوتییە ئەگەر بزانن مەزن ژی ڕێزێ ل ژینگێ ناگرن، ئهو ڕێکێ نەدەنێ، ئهو پاشەڕۆژا ڤی وەلاتی نە، ئهو دشارێن بڕیارێ بدەن کو پاشەڕۆژا ڤی وەلاتی ب بەرەڤ کیژ ئاراستەیێ بچیت. لهۆرا هەتا ههو بکارن ژینگەها وەلاتێ خۆ بپارێزن، د هەمان دەم دا ئهو دەبێت ب هەمی شێانێن خۆ بزاڤا سەرکەفتنێ د قۆناغێن خوێندنا خۆ دا بدەن، پێش هەمی شتەکێ ژ وان شتێن من باسی کرین دەبێت بیرێن هەوە ل وێ چەندێ ژی بێت کو دەبێت نیشتمانپەروەر بن، ئەڤ وەلاتە بەرهەمێ خوێنا شەهیدێن مە یە، بەرهەمێ زەحمەت و ڕەنجا پێشمەرگەیێن قارەمانێن مە یە. دەما من گووه لێ بووی ئهو هەمی وەختا دگۆتن بژی پێشمەرگە، ئەڤە دروشمەک بێت دەبێت د ناخێ خۆ دا ڕێزێ لێ بگرین، ڕێزێ ل پێشمەرگەیێن خۆ بگرین، ڕێزێ ل نیشتمانێ خۆ بگرین، و حەژ وەلاتێ خۆ بکەین، چونکی ئەم ب وەلاتێ خۆ ڤە یێن جوانین، ب سەربلندیا ڤی وەلاتی ئەم دشارێن سەربلندتر ببن.
ئەز سوپاسیا مامۆستایێن بەڕێز ژی دکەم کو د هەمی قۆناغان دا نەهێلاینە خوێندن پەکی کەڤیت، ئەو مامۆستایێن دڵسۆز ئهوێن د کەش و دۆخەکێ نەخۆش و نەساز دا گەشە ب خوێندن و فێرکرنا قوتابیان دای و مامۆستا ئێکەم وانەیە کو قوتابی ژێ فێر دبیت. مامۆستا ب کریارا خۆ دشێت ب قوتابی بێژیت کو ببیتە چ جۆرە کەسەک، لهۆرا لێبۆردەیی و دلۆڤانی و ئاستێ بلند یێ مامۆستا دشێت پێشکێشی قوتابی بکەت، دشێت ل وێ چەندێ دڵنیا بێت کو ئەڤ قوتابییە ژی ب وی جۆری دێ هێتە پەروەردەکرن. لهۆرا جارەکا دی سوپاسیا خۆڕاگری، ماندووبوون و خزمەتا وان مامۆستایێن بەڕێز دکەم، ئهم شانازیێ ب هەوە دکەین، خودێ هەژمارا هەوە پتر بکەت، هەر سەرکەفتی بن.
دەستخۆشیێ ل هەمی لایەکێ دکەم، سوپاسیا وەزارەتا پەروەردێ دکەم بۆ وان کارێن باش ئهوێن دکەن بۆ بلندکرنا ئاستێ خوێندنێ. ل سەرۆکیا هەمیان ژی جارەکا دی پیرۆزباهیێ ل هەمی قوتابییێن خۆشتڤی دکەم، هەر سەرکەفتی و ساخلەم بن و ساڵەکا پڕ ل دەستکەفت و سەرکەفتن د پێش هەوە دا بێت.