ناڤەندا نووچەیان – سەما
پرۆژێ جووتسايدێ رێكا شێخان بۆ په‌رستگه‌ها لالش، ب درێژاهيا زێده‌تر ژ هه‌شت كيلۆمه‌تران لدووڤ ديزانه‌كا رێك و پێك و سه‌رده‌ميانه و ستاندارێن جيهانى دئێته ئه‌نجامدان.
ماوێ پرۆژه‌ى 400 ڕۆژن و پێشبينى دئێته دكرن به‌رى ژڤانێ خۆ يێ ده‌ست نيشانكرى ته‌مام ببت و بكه‌فته دخزمه‌تا خه‌لكى دا.
ئێك شه‌مبوويێ، 23ى شوباتا 2025ێ، ئه‌ندازيار خالد نه‌رمۆ، سه‌رۆكێ باژێرڤانيا شێخان بۆ سه‌ما راگه‌هاند: ل سه‌ر راسپارده‌يێن رێزدار مه‌سرور بارزانى، سه‌رۆكێ حكومه‌تا هه‌رێما كوردستانێ ل مه‌ها نه‌هـ يا سالا بۆرى به‌رێ بنياتى بۆ پرۆژێ جووتسايدێ رێكا شێخان بۆ په‌رستگه‌ها لالش هاته دانان و ب درێژاهيا زێده‌تر ژ هه‌شت كيلۆمه‌تران كار ل سه‌ر پرۆژه‌ى دئێته كرن.
خالد نه‌رمۆ ئاشكراكر:” تا نوكه نێزيكى 40% كار ل سه‌ر پرۆژه‌يى هاتييه كرن و پرۆژه يێ به‌رده‌وامه و ب شێوه‌يه‌‌كى پێشكه‌فتى قۆناغێن باش ده‌ربازكرينه و پێشبينى دكه‌ين به‌رى ژڤانێ خۆ ب داوى بێت”.
جووتسايدێ په‌رستگه‌ها لالش ب پرۆژه‌يه‌كێ گرنگ دئێته ل قه‌له‌مدان و دێ روودانێن هاتن و چوونێ كێم بن و پتر ئاسانكارى بۆ خه‌لكى ئێنه كرن ب تايبه‌ت ل ده‌مێ جه‌ژن و هه‌لكه‌فتان دا.
دكابينا نه‌هى يا حكومه‌تا هه‌رێما كوردستانێ دا، چه‌ندين پرۆژه‌يێن خزمه‌تگۆزارى ل په‌رستگه‌ها لالش هاتينه ئه‌نجامدان، مينا دروستكرنا ده‌روازێ په‌رستگه‌هێ ب شێوازه‌كێ كه‌ڤنار و كارگه‌ها به‌رهه‌مئينانا زه‌يتا زه‌يوونا و نووژه‌نكرنا په‌رستگه‌هێ و چه‌ندين پرۆژه‌يێن ديتر كار ل سه‌ر دئێته كرن.