ناڤه‌ندا نووچه‌يان – سه‌ما
ئەندامه‌كا پەرلەمانێ عيراقێ و په‌يڤدارا فراکسیۆنا پارتى دیموکراتی کوردستان ل پەرلەمانێ عيراقێ ڕاگەهاند، هەر حکومەته‌ک هاتبتە سەر دەستهه‌ڵاتێ کێشە بۆ هەرێما کوردستانێ دروستکرينە، چنکو حکومەتا عيراقێ باوه‌رى ب دەستوورى نینە.
ئێك شه‌مبوويێ، 8ـی حوزەیرانا 2025، د.ڤیان دەخیل، ئەندامه‌كا پەرلەمانێ عيراقێ و په‌يڤدارا فراکسیۆنا پارتا دیموکراتی کوردستان ل پەرلەمانێ عيراقێ، بۆ کوردستان24 ڕاگەهاند، هەر حکومەته‌كا عيراقی هاتبتە سەر دەستهه‌ڵاتێ، دزانت دەستوورێ عيراقێ چییە، چنکو پشتى ژناڤچوونا ڕژێما گۆڕ ب گۆڕ يا عيراقێ، ئەو ل گەڵ مه بوون ل دانانا دەستوورى دا.
ئەو پەرلەمانتارە دبێژت: ئەگەر بێت و باس ل ماف و ئیمتیازاتێن هەرێما کوردستانێ بكه‌ن، ئەو وه‌سا دكه‌ن کو چ تشته‌كى دەربارەی دەستوورى نزانن! ئه‌م هەموو ده‌مان دبێژين ئەو بنەمایێن فیدراڵی نزانن، ڵێ ئەڤه وه‌سا نینە، ئەو زۆر باش دزانن و زۆر ب باشى ژى دەستوور خووندينە. بەڵێ تا نوكه قه‌بووڵ ناکەن ل دەستوورێ عيراقێ ماددەیا 117، کو دبێژت هەرێما کوردستانێ ب یاسا هەرێمه‌كا دەستووری و کیانه‌كێ سیاسییە و حکومەت و پەرلەمانێ خۆ هەیە.
هەموو پێکڤە ڕێک دکەڤن داكو ل دژی هەرێما کوردستانێ كێشه‌يان دروست بکەن
دبێژت: هەموو ساڵان مه کێشە ل گەڵ واندا هەیە، چ ساڵان کێشەيێن مه ل گەڵ ئەوان چارەسەر نەبووينە، ئه‌م دگەهینە ئاسته‌كى، ئەو دئێن ب گۆتاره‌كا سیاسی یان داخويانيێن سیاسی ئەو کو بناڤێ سیاسه‌تڤانن، ل وەزارەتا دارایی، یان سامانێن سروشتی کێشەیەکێ دروست دکەن و هەموو پێکڤە ڕێک دکەڤن داكو ل دژی هەرێما کوردستانێ كێشه‌يان دروست بکەن.
د.ڤیان دەخیل، ئاماژە ب وێ چه‌ندێ دا، لیژنەيێن هەرێما کوردستانێ هەموو فایلێن خۆ ب شێوەیەکی شەفاف و ڕوون بۆ حکومەتا بەغدا دیار دکه‌ت، بەڵێ بەغدا ب ئارەزوویا خۆ به‌هانه‌يه‌كێ دئينته دەرێ ل دژى هەرێما کوردستانێ. بڕینا مووچەیێ فەرمانبەرێن هەرێمێ ب به‌هانه‌يا هندێ كو بوودجەیا هەرێما کوردستانێ هەموو دايە، مه‌ونترين شاشيه، چنکو چ بەڵگە و ڕاستییەک بۆ پاڵپشتیا ڤێ بڕیارێ نینە.