مەسرور بارزانی: ئاڵایێ پیرۆزێ کوردستانێ هێمایێ ئاشتی و ئاڤەدانی و پێكڤەژیانێ يه
ناڤەندا نووچەیان – سەما
ب ئامادەبوونا مەسرور بارزانی، سەرۆکێ حکومەتا هەرێما کوردستانێ، ل كهلها هەولێرێ، ڕێورەسمهكا تایبەت بۆ ڕێزگرتن ل ڕۆژا ئاڵایێ کوردستانێ ب ڕێڤەچوو.
ئيڕۆ چارشەمبوويێ 17ی کانوونا ئێكێ 2025، د ڕێوڕەسمەکێ دا، کو ژمارەیەکا نووێنەر و کەسایەتيێن پێکهاتەيێن ئۆلى و نەتەوەیى يێن هەرێما کوردستانێ پشكداربوون، سەرۆکێ حکومەتێ د گۆتنێن خۆ دا گۆت، سهربارى پیرۆزباهیکرنا ڕۆژا ئاڵایێ کوردستانێ، دووپاتکر کو ئاڵایێ کوردستانێ، هێما و سیمبولا گەلێ مهيه، هێما و سیمبوڵا خۆڕاگری و هێمایێ ئاشتی و ئاڤەدانی و پێكڤەژیانێ يه، هێمایێ بەردەوامیا ژیانێ و هێمایێ وزە و هێزێ يه.
سەرۆکێ حکومەتێ تهكهزكر، ئەڤ ئاڵایە ب درێژاهيا مێژوويێ و هەر ل دهمێ دروستبوونێ تا نوكه، چەندین جاران بوويە بەرگێ جەستەیا گیانێ ههزاران شەهیدان ل كوردستانێ دا. هەروەسا ل پێناڤى بەرزڕاگرتنا ڤى ئاڵایى، ههزاران تێكۆشەڕێن دى ل زیندانان گیانێ خۆ سپارتيه یان بەرەف سێدارەدانێ چووينه، یان ل گۆپيتكا چیايان و پانيا دەشتان گیانێ خۆ سپارتيه. لهوا ئەركێ مه هەموويانە ئەوى ئاڵایێ بەرز ڕابگرین.
سەرۆکێ حکومەتێ هەروەسا گۆت: نوكه لژێر سایا ڤى ئاڵایێ پیرۆز بەرەف كوردستانهكا ئاڤەدان و ئارام و سەقامگیر، دەست ل ناڤ دەستێ یەكتر، پێنگاڤان دهاڤێژين، لهوا بەرز و بلند بت ئاڵایێ پیرۆزێ كوردستانێ.