ناڤەندا نووچەیان – سەما
ل ڕۆژا دووشەمبوویێ 2ی شووباتا 2026، حازم تەحسین بەگ، میرێ ئێزدییان ل کوردستان، عێراقێ و جیهانێ پێشوازی ل بێریڤان ئایماز، جێگرا سەرۆکێ پەرلەمانێ هەرێما نۆردراین – ڤێستڤالن یا ئەلمانی و شاندێ دگەل دا کر.
ب گۆڕەیی ڕاگەهاندنا نڤیسینگەها جڤاتا ڕۆحانی یا بلند یا ئێزدییان، پشتی بخێرهاتنا شاندی، میرێ ئێزدییان شرۆڤەیەک دا سەر ئەوان بوویەر و کۆمکووژییا ب سەرێ ئێزدییان دا هاتی ل سەر دەستێ رێکخراوا داعش یا تیرۆرستی ل 3ی تەباخا 2014.
وەکو د ڕاگەهاندنێ دا هاتی” میرێ ئێزدییان گۆت: ئەم کەیفخۆش دبین دەمێ شاند ژ وەلاتێ ئەلمانیا سەرەدانا مە دکەن و ب چاڤێن خۆ هایداری ڕەوشا کەمپان ببن.”
هەروەسا ئاماژە دا ئێش و ئازارێن ئێزدییان و کاودانێن تێرا دەرباز دبن ل وەرزێن زڤستان و هاڤینێ کو ئەڤە بخۆ نیشانا بەردەوامییا جینۆسایدێ یە.
دوپاتکر، پێدڤییە ئەلمانیا گڤاشتنێ ل وەلاتان و د مەحفەلێن ناڤدەولەتی دا بکەت ژبۆ دیتنا ڕێگە چارەیەکێ ژبۆ ڤەگەڕیانا ئاوارەیێن ئێزدی ب سەر بلندی بۆ سەر جھ و وارێن خۆ.
میرێ ئێزدییان تەکەزی ل سەرپرسا کۆچبەرێن ئێزدی کر و گۆت: دخوازین ئەلمانیا یاسایەکێ دەربێخت کو ڤەگەڕاندنا کۆچبەران یا ب زۆرەملێ ب سەکنینت، ژبەرکو ئێزدی د کاودانێن نەخۆش دا دەرباز دبن.
دیار ژی کر، ئێزدی ئەلمانیا ب وەلاتێ خۆ یێ دووێ دبینن، کو دانپێدان ب جینۆسایدا ئێزدییان کرییە و هاریکارییا وان دکەت.
ژ لایێ خۆڤە، خانم بێریڤان ئایماز گۆت: ئێزدی دۆستێن مەنە و رەڤەندەکا مەزن یا ئێزدییان ل هەرێما مە هەیە و ڕێزێ ل ئەوان دکرین و دێ مە بەرنامەیەکێ کاری هەبت سەبارەت پرسا ڤەگەڕاندنا ب زۆری یا کۆچبەرێن ئێزدی.
ئاماژە ب وێ چەندێ دا، پێدڤییە پێکڤە کاربکەین ژبۆ دادپەروەرییێ بۆ جڤاکێ ئێزدی وڕزگاربوویان، ژبەرکو ئەوا ب سەرێ ئێزدییان دا هاتی ب هەموو پیڤەران جینۆسایدە.
پاشان شاندێ ناڤبری گەریانەک دناڤ هندورێ پەرستگەها لالش یا پیرۆز دا کر و ڕورەسمێن ئۆلی یێن ل پەرستگەهێ دئێنە کرن ژ لایێ کەریم سلێمان، شێوەرمەندێ جڤاتا ڕۆحانی یا ئێزدییان ڤە هاتنە شرۆڤەکرن.