ڕاگەهاندن وساخكرنا بیرەوەریان
جەمــــال كودی
راگەهاندن ب هەموو جۆریت خۆڤە بشێوەیەكی گشتی ئێكە ژفاكتەرێت گرنگ ژبۆ گەهاندنا پەیامامەكێ وژبۆ بەرژەوەندیا تەڤایا تەخ وچینێت مللەتان ب ئەركێ خوە رادبت. ساخكرنا بیرەوەری وجەژن وهەلكەفتێت ئایینی ونەتەوەیی لگۆر شیان وكاودانێت هاریكارچەند بویەرەكێت دیرۆكینە پیتڤیە راگەهاندن رۆلەكی باش د رۆمالكرن و بیرئانینا وان دە بینت.
دجڤاكێ مەدە ژی بیرەوەری وهەلكەفتیت گرنگ هەنە وەك بیرهاتن وتشتەك پیرۆز دئێنە هژمارتن ؛ئەڤجا چ نەتەوەیی، ئایینی یان گرێدای بیر وباوەر ومیسۆلۆژیا جڤاكی و تایبەتمەندی و رێك وشێوازێت جودا وان بیرەوەری وهەلكەفتا وەك نەریتەك سالانە ساخدكەت داكو وەندا نەبن ونفشێت نوو پێزانین ل سەر هەبن؛چنكو دئێنەهژمارتن بەشەكی گرنگ ژ رەسەنی وكەلتوور وكەڤناتیا تاكێت مللەتی. لگۆر بۆچۆنێت جودا جودا مللەتێ مە ئێكە ژمللەتێت كەڤنێت دەڤەرێ و گەلەك جەژن وبیرەوەری وهەلكەفتێت ئۆلی ونەتەوەیی هەینە و ژكەڤن دە هاتینە گێَران لێ لگۆر ژیانا وی دەمی وشیانێت بەردەست بێشوێ پێتڤی نەهاتینە نیشاندان، ئەوژی ژبەر نەبوونا دەمەكی تەرخانكری ژلایێ ئالاڤێت راگەهاندنێ گرێدای تایبەتمەندیێت ڤان هەلكەفتا .نهۆ لدیف ئالاڤێت راگەهاندنێ ورێپێدانا وان تا رادەكێ دبەرژەوەندییا بەخشكرن و نیشاندانا هەلكەفت وجەژنان دەیە؛ئەڤجا چ یێت دیتنێ، بهیستنێ یان خواندنێ وزێدەباری هەبوونا مەدیا ڤانێت بسپۆر وتایبەتمەند ل چەندین دەزگەهێت راگەهاندنێ فەرە هەربیرەوەریەك ددەمێ گونجای دە بهیتە ساخكرن وهەر ئالاڤەك بەحسێ لایەنەكی هەلكەفتێ یان بیرەوریێ لگۆر زانیاریێت باوەرپێكری بكەت داكو نفشێ نوو بتر زانیاریا لسەر وەرگرن وكەسانێت بیانی ژی یێ بڤێت زانیاری لسەر هەبن، هەروەسا وەك ئەرشیف ژی بمینت ژبۆ ئایندەی ئەگەر خویندكارەك یان نڤیسكارەك پیتڤی بوو.
سال ڤەگەرێت كۆمكوژی وجینۆسایدا ژی چ ل وەلاتی یان ژدەرڤەی وەلاتی دەمێ دئێنە ساخكرن بتر گرنگی ژهەموو جۆرێت را گەهاندنێ ڤە پێ بهێتە دان؛ بتایبەتی یێت بۆ جیهانێ دئێنە ئاراستەكرن وئەگەر گرنگی ب كەس وكارێت قوربانیا دناڤ پرۆگرامان دە بهێتە دان باشترە بۆبتردیاركرن ودكیۆمێنتكرنا بەلگان، هەردیسان ژلایێ هونەری ڤە ژی دشیاندە یە راگەهاندن بتر بویەر وسەرهاتیان بدەتە دیاركرن؛ چ شانۆ، مۆزیك یان شێوەكاری لدیف پرۆگرام ودەم وجهێ ئەو بیرەوەری لێ دئێتە ساخكرن؛ژبەر كو گەلەك كەسانێت هونەرمەند شیانێت خۆ داینە كاری ژبۆچێكرنا كورتە فلم وتابلویێت شێوەكاری وسترانا لدۆر ڤان جۆرە كۆم كوژی وبیرەوەریا؛ ئەڤجا دەرفەتەكە زێرینە ل ڤان سالڤەگەرا بهێنە نیشاندان.