سه‌ما
ب هەول و خەباتا وەزارەتا ناڤخۆ و لقێ 17 یێ پارتی، ژ نها و پێڤە دێ رێ ل ئاوارەیێن شنگالێ ئێتە دان کو ل دهۆکێ کارتا نیشتيمانی دەربێخن.
ئيرۆ دووشەمبوويێ، 11ى تشرينا دووێ 2024ێ، ڤیان دەخیل، په‌يڤدارا فراکسیۆنا پارتی ل پەرلەمانێ عیراقێ د کۆنفرانسەکێ رۆژنامەڤانی دا راگەهاند “وەک ئاسانكارى بۆ وەلاتیێن ئاکنجی ل ناڤ و دەرڤەی کەمپان، ژ نها و پێڤە دكارن ل دهۆکێ مامەلەیا دەرخستنا کارتا نیشتيمانی بکەن، ل شوونا چوونا شنگالێ.”
په‌يڤدارا فراکسیۆنا پارتی دیار ژى کر، تیمەک ژ نڤیسینگەها وان دگەل نوونەرێ رێڤەبەریا کۆچ و کۆچبەران یا دهۆکێ و کارمەندێن فەرمانگەها کارتا نیشتيمانی، دێ سەرەدانا کەمپان کەن دا رۆژانە مامەلەیێن 100 ئاواران ب رێڤه‌ببه‌ن، ئەڤە ژی وەک وێ گۆتی “ب هەول و خەباتا وەزارەتا ناڤخۆ یا حکومەتا هەرێما کوردستانێ و لقێ 17 یێ پارتێ دیموکراتى کوردستانێ بوویە.”
ب گۆتنا ڤیان دەخیل: “رۆژانە ل مالپەرێ ئەلیکترۆنی یێ رێڤەبەریا کۆچ و کۆچبەران یا دهۆکێ و نڤیسینگەها پەرلەمانى ناڤێ وی کەمپێ دێ ئێتە بەلاڤکرن کو تیمێ هەڤبەش دێ چت بۆ کۆمکرن و تەمامکرنا زانیاریان.”
ژ ئالیێ خۆڤە پیر دەیان، رێڤەبەرێ کۆچ و کۆچبەران ل پارێزگەها دهۆکێ ئەو یەک دیارکر، ئەڤ یا هاتیە کرن گاڤەکا گرنگە بۆ ئاسانکرنا دەرخستنا کارتا نیشتيمانی بۆ ئاوارەیێن شنگالێ ل دهۆکێ، هەم بۆ کورتکرنا رێکێ و هەم بۆ کێمکرنا مەسرەفێن چوون و هاتنێ، بۆ لەزکرنا پرۆسێ ژی دێ هەموو هەماهەنگیێ کەين.