داوازدە سال دەربازبوون ب سەر قرکرن و دەربەدەرکرنا خەلکێ بێ گونەهێ شنگالێ دا. دوازدە سال بۆرین و برینێن دلێ گەلەک دایکا نەهاتینە کەواندن و جەگەرێ وان ژ بۆ دیتنا زارۆکێن وان یؽن د دەستین تیرۆرستان دا دهێتە سۆتن و خەمێن دلێ وان نەهاتینە رەڤاندن.
دوازدە سال هاتنە هەژمارتن و ئێش ئازارێن فەرمانێ ل دلێ شنگالیان دا کێم نەبووینە.
دوازدە سالن ژیانا ب هەزاران خەلکێ شنگالێ ل ژێر زەحمەتیا ژیارێ دهێتە گێران.
هەر ب ئەڤێ هەلکەڤتا ناخ هەژین یا کو تەڤایا خەلکێ شنگالا خۆراگر ل ٣ی تەباخا ٢٠١٤ێ بوویە ئارمانجا هێرشێن هزر و بیرێن نەژادپەرێس یێن چەکدارێن رێکخراوا تیرۆرستی یا داعش دوژمنێ مرۆڤایەتیێ کو ب هێز هەولێن نەمانا ئەڤی مللەتێ بێ گونەهـ داین و ژمارەکا مەزن ژێ کوشتین و بێسەروشوین و کج و ژن و زارۆکێن وان رەڤاندین، لەوا فەرە ئەم بەژنا خۆ لبەر خۆراگری و زەحمەتیا ئەڤی خەلکێ شەرفمەند بچەمینین و سەرێ رێزێ ژ بۆ جانفیداین ئەڤێ فەرمانێ دابنێین کو ب سەرەکی بلند ڤە خۆ گۆری ئاخ خۆ با پیرۆز و رێ و رێبازا گەڤنار یا باب و کالێ خۆ کرین و بووینە قوربانیێن ئۆل و نەتەوەیا خۆ یا دێرین و مرن هلبژارتین و خۆ رادەستی زۆرداریی و بێ وژدانیا نە مەردا نەکرین ئەویین ل ئەڤێ رۆژا رەش دا ب رەنگەکی هۆڤانە ب سەرواندا گرتین و جهـ و وارێ وان تالان و وێران کرین.
سلاڤ ل خۆراگریا خەلکێ شنگالا بریندار کو خۆ ل بەر دژواریا دوازدە سالێن پری زەحمەت گرتین، سەربەرزی بۆ تەڤایا گەلێ کوردستانێ کو هەر ژ دەستپێکا ئەڤێ فەرمانێ ب وژدانەکی نەتەوەیی و مرۆڤ دوستانە ب ئەرکێ خۆ رابووین و دانوستاندنەکا مەردانە دگەل خەلکێ شنگالێ کرین.
هەر سەربەرز و سەرکەڤتی بیت سەرکردایەتیا پارتی دیمکراتی کوردستان و بتایبەت جەنابێ سەرۆک بارزانی و حکومەتا کوردستانێ کو لبەر بارێ خەلکێ خۆ یێ شنگالی رابووین و ل درێژیا دوازدە سالان ب دلەکی مەزن چاڤدێریا رەوشا وان کرین.
ل داویێ هیڤیدارین چارەسەریەکا ب لەز ژ بۆ ئەوان گرتیێن ماین دناڤ دەستێن تیرۆرستان دا بهێتە کرن و رێکخۆشکرنەکا ئارام ژ هەژی خۆراگریا خەلکێ شنگال پێخەمەت ڤەگەریانەکا سەرفەراز ژ بۆ سەر جهـ و وارێن وان بهێتە دیتن و هەموو هەول و بزاڤ بکەڤنە کار ژ بۆ ئاڤەدانیا شنگالەکا ئازاد.
