ناڤه‌ندا نووچه‌يان – سه‌ما
رێڤه‌به‌رێ گۆڕێن بکۆم ل وەزارەتا کاروبارێن شەهید و ئەنفالکریێن حکومەتا هەرێما کوردستانێ ڕاگەهاند، 18 گۆڕێن بکۆم يێن دی يێن قوربانیێن دەستێ داعشێ ل شنگالێ ئامادەنە بۆ ڤەکرنێ، و بۆ ڤێ مەبەستێ ل ڤێ هەفتیيێ شاندەکێ هەرێما کوردستانێ دێ سەرەدانا بەغدا کەت.
ئارام نووری، رێڤه‌به‌رێ گۆڕێن بکۆم ل وەزارەتا کاروبارێن شەهید و ئەنفالکریيان، بۆ کوردستان24 ئاشکرا کر، هەموو ئەو گۆڕێن بکۆم پاشماوێ تاوان و ئێرشێن تیرۆریستێن داعشێ نە بۆ سەر دەڤەرا شنگالێ، و نهۆ د قۆناغا ئێکێ دا 18 گۆڕ ب تەمامی ئامادە کرینە دا کو پرۆسەیا ڤەکرنا وان دەست پێ بکەت.
رێڤه‌به‌رێ گۆڕێن بکۆم دیار ژى کر، ڕێککەڤتنا تەمام د ناڤبەرا حکومەتا هەرێما کوردستانێ و حکومەتا فیدڕال ل بەغدا هاتیيە کرن دا کو تیمێن هەردو ئاليیان ب شێوەیەکى هەڤبەش دەست ب پرۆسەیا ڤەکرنا گۆڕان بکەن.
بۆ جێبەجێکرنا ڤێ پێنگاڤێ و دیاریکرنا دەم و شێوازێ کارکرنا مەیدانی یا تیمان، بڕیارە ل دەستپێکا ڤێ هەفتیيێ شاندەکێ وەزارەتا کاروبارێن شەهید و ئەنفالکریيان سەرەدانا بەغدا بکەت دا کو ڕێکارێن هونەری و یاسایی ل گەل ئالييێن پەیوەندیدار يێن حکومەتا عێراقێ بێنە ئێکلایکرن.
د دەمێ ئێرشا تیرۆریستێن داعشێ بۆ سەر قەزا شنگالێ ل هه‌يڤا ته‌باخا 2014ێ دا، سەدان تاوانێن کۆمکووژیيێ ل دژى ئێزدییان هاتنە ئەنجامدان و ب دەهان گۆڕێن بکۆم ل دەڤەرێ مانەڤە، هەتا نهۆ ژی پرۆسەیا ڤەکرن و ناسینا ڕوفاتێن قوربانییان ب ڕێيا پشکنینا (DNA) بەردەوامە دا کو ب شێوەیەکى شایستە ب ئاخا نیشتيمانی بێنه سپاردن.