ناڤهندا نووچهيان – سهما
نڤیسەرێ گەنجێ خەلکێ شنگالێ، مەروان داود، راگەهاند کو د نێزیکترین دەم دا دێ نووترین بەرهەمێ خۆ ب ناڤێ “کەزی” بەلاڤ کەت، کو ژ 15 چیرۆکان پێکدهێت و باس ل کێشەیێن جڤاکی و ستەما ل سەر مرۆڤان د چەندین وەلات و باژێرێن جودا دا دکەت.
ئيرۆ پێنج شەمبوويێ، 23ی نیسانا 2026، مەروان داود، نڤیسەر و رۆژنامەڤانێ خەلکێ شنگالێ، بۆ سهما راگەهاند، پەرتووکا وی یا نوو ب ناڤێ “کەزی” یا ئامادەیە بۆ چاپێ و ژ لایێ “مالا شنگال بۆ هونەری” ڤە دێ هێتە چاپکرن و بەلاڤکرن.
مەروان داود ئاشکرا کر کو پەرتووک ژ 80 بەرپەران پێکدهێت و 15 چیرۆکان دخۆ دا دگریت، کو روودانێن وان ل چەندین باژێر و وەلاتێن وەک (شنگال، دهۆک، بەیروت، تاران، قاهیرە، دیمەشق، مووسڵ، بەغدا و ئەستەنبوڵ) رووددەن.
گۆتژی: “د ناڤ بەرپەرێن ڤێ پەرتووکێ دا، چەندین کێشەیێن جڤاکی هاتینە بەرچاڤکرن کو مرۆڤ رۆژانە رووبەرووی وان دبیت، هەروەسا بەحس ل وێ زۆلم و ستەمێ دکەت یا ل مرۆڤان دهێتە کرن.”
دەربارەی ئەگەرێ ناڤنانا پەرتووکێ ب “کەزی”، وی نڤیسەرێ گەنج گۆت: “دەمێ روودانێن رۆژئاڤایێ کوردستانێ رووداین، ئەز ژ نڤیسینا ڤی بەرهەمی ب دووماهی هاتبووم، لێ وەک هەستەکێ نەتەوەیی و نیشتمانی و بۆ نیشادانا ئێکڕێزییا کوردان، چیرۆکەکا دی دەربارەی کچەکێ بۆ پەرتووکێ زێدە کر و ناڤێ پەرتووکێ ژی من گوهۆری بۆ ‘کەزی’.”
مەروان داود هیڤی خواست کو ئەڤ بەرهەمە بشێت پەرتووکخانەیا کوردی دەولەمەندتر لێ بکەت.
مەروان داود ل سالا 2002 ل شنگالێ ژ دایک بوویە، دەرچوویێ پشکا زمانێ کوردییە ل زانکۆیا دهۆک. بەری نوکە بەرهەمەکێ دی ب ناڤێ “ئاوازێن هێژیران” چاپ کرییە و نوکە وەک رۆژنامەڤان د کەناڵێ “سەما” دا کار دکەت.