Navenda Nûçeyan – Sama
Encumena Êzîdiyên Sûriyê bang li hikûmeta nû a Sûriyê dike ku rêz li maf û nasnameya Êzîdiyan bigire û mafên wan bi hemû civakên din re wekhev gerantî bike.
Kendal Remo, endamê Encumena Êzîdiyên Sûriyê, roja Pêncşemê, 4ê Hezîrana 2026an ji Sama Tv re got, “Êzîdiyan ji her komeke olî a din bêtir neheqî, bêparkirin û bêparmayîn kişandine, û dem hatiye ku ev neheqî bi dawî bibe.”
Endamê encumenê eşkere kir ku wan di demên berê de gelek daxwaz pêşkêşî Hikûmeta Demkî ya Sûriyê kirine, û tekez kir ku:
“Ew bêbersiv mane, û van saziyan ti girîngiyek nedaye mafên Êzîdiyan.”
Remo her wiha destnîşan kir ku ew bang li Hikûmeta Herêma Kurdistanê, û her weha partiyên Kurdî yên li Sûriyê dikin ku zextê li hikûmeta Sûriyê bikin da ku mafên Êzîdiyan nas bike û biparêze.
Paşxaneya dîrokî: Êzîdî li herêmên cuda yên Rojava (Rojavayê Kurdistanê) belav bûne, lê piştî destpêkirina şerê Sûriyeyê di sala 2011an de û êrîşên DAIŞê, bi hezaran ji wan neçar man ku koçber bibin, ku ev yek bû sedema kêmbûneke berbiçav di hejmara wan de li herêmê.