شەڤ بوو، ستێرێن ئەسمانی وەک چاڤێن هیڤیدار دبریسکان. خاتوون رونشتبوو ل بەر دەرگەهێ چادرەکێ کو ئەو و هەر چار زارۆکێن وێ تێدا دژیان. ئەو ژنەکا بیست و حەفت ساڵی بوو، بێ مێر، بێ پشتەڤان، تەنها ل کەمپا ئاوارەیان ل دەرڤەی شنگالێ دژیان . شەڕی هەموو تشت ژ وێ ستاندبوو: خانی، مال، و هەروەسا هێڤیێن وێ.
خاتوونێ دەستێ خۆ ب هێمنی ل سەر چاڤێن خۆ یێن وەستیای دانابوو ، ئیرۆ ژی رۆژەکا دی بوو کو وێ نەشیا کارەکی بدەست خۆڤە بینت. چەند هەیڤ بەری نها، خاتوونێ چیرۆکا خۆ ل سەر مالپەرەکا تۆرێن جڤاکی پارڤەکربوو، ل هیڤیا کو کەسەک دێ هاریکاریا وێ کەت.
رۆژەکێ تەلەفۆنەک هات. دەنگەکی گەرم یێ مەزنی:
“سلاڤ! ئەز کارزانم، ئەز چالاکڤانەکم و من چیرۆکا تە خوەند. ئەز دخوازم هاریکاریا تە بکەم.”
پشتی وێ پەیڤێ، خاتوونێ هەست ب تیرۆژکا هیڤیێ کر بۆ جارا ئێکێ پشتی گەلەک وەختی. ئەوی چالاکڤانی دیارکر کو گەلەک خەلکی ل سەر چیرۆکا وێ پارە کۆمکرینە و ئەو دێ پارەی بگەهیتە دەستێ وێ دا کارێت زارۆکێن خۆ خوەدی بکەت.
هەیڤەک بۆری، دوو هەیڤ بۆرین… چ پارە نەهاتن.
“بەلێ هێشتا دگەل کۆمپانیێ دا گفتوگۆ دکم.”
“بەلێ پارە هاتینە، بەس دەربازکرنا وان گرانە.”
“بەلێ ئەز نەخۆشم، بەس دێ هەولدەم بێم هەفتیا تێت.”
هەر جارەکێ بەهانەیەکا نوی.
ل دەمێ کو ژیانا خاتوونێ روژ بۆ روژ دژوارتر دبوو، زارۆکێن وێ بێ پێلاڤ، بێ جلێن گەرم، و جار جار بێ خوارن. ئەو ئافرەتا نەرم و بێدەنگ هێدی هێدی ئەو راستی فێربوو کو ئەو چالاکڤان تەنێ ناڤێ وێ و چیرۆکا وێ بۆ قازانجا خۆ بکاردئینت.
روژەکێ، ژنەکا دی ژ کەمپێ هاتە تەڤلی چیرۆکا خاتوونێ بوو. ئەو ژی قوربانیا هەمان “چالاکڤانی” بوو. وان ئافرەتان دەست ب پشکنینێ کرن ل سەر تۆرێن جڤاکی. وان دیت کو ئەو “چالاکڤان” گەلەک پەرە ب ناڤێ وان پەیدا کریە، بێ کو دینارەکی ژی بۆ وان بنێریت.
خاتوون، نە ژبەر وێ چەندێ کو ئەو پارە بۆ وێ نەهاتن، بەلکو ژبەر وێ چەندێ کو کەسەکی نەخۆشی وێ و زارۆکێن وێ بۆ فایدەیەکا کەسوکی بکارئینا، بریار دا دەنگێ خۆ بلند بکەت. وێ چیرۆکا خۆ بۆ رێکخراوەکا نڤیسکاری یا نڤیسی، داکو خەلکێ ئاوارە ژی کەرامەت و ناڤ و شەرەفا خۆ هەیە، و نابت کەس وان بخاپینت.
ئیرۆ، خاتوون نە تنێ دێ راوەستت ژبۆ خۆ، بەلکو ژبۆ هەموو ئەو ئافرەتێن کو بوونە قوربانیا کەسێن نەخۆش ل ژێر ناڤێ “چالاکڤانیێ” دا.
راستی هەرچەندە یا تەعل ژی بت ، هەر دێ ئاڤا بت لسەر کاغەزێ و ل ناڤ دلان دا ژی .